Mae Breaking the Box yn brosiect cydweithredol sydd wedi’i ariannu gan Gyngor Celfyddydau Cymru drwy gronfa arloesol Cysylltu a Ffynnu. Mae partneriaid y prosiect yn cynnwys y partner arweiniol, Theatr Taking Flight, partneriaid lleoliadau fel Theatrau Sir Gâr, Theatrau RhCT, Pontio a Hynt, a phartneriaid annibynnol eraill.

Dyfarnwyd cyllid i Breaking the Box i ddatblygu rhwydwaith o leoliadau cynhwysol a hygyrch yng Nghymru sy’n hyderus ac yn cefnogi’r gwaith o groesawu artistiaid amrywiol, aelodau criw cefn llwyfan, staff gweinyddol a chynulleidfaoedd.

Mae’r prosiect yn cynnig hyfforddiant a chymorth i egin-weithwyr theatr Byddar, anabl a niwrowahanol, ac mae’n gweithio at ymgorffori rolau ar gyfer pobl greadigol Fyddar, anabl a niwrowahanol mewn canolfannau perfformio yng Nghymru yn y dyfodol.

Fel rhan o'r prosiect mae Pobl Greadigol ar Drothwy Eu Gyrfa sy’n Fyddar, yn anabl neu’n niwrowahanol yn cael eu mentora ac yn cael hyfforddiant a lleoliadau gwaith gyda lleoliadau partner a sefydliadau eraill. Rhoddodd Mary-Jayne Russell de Clifford, y Rheolwr Prosiect, gyflwyniad ar Breaking the Box yn ystod Cynhadledd Creu Cymru 2023.

Drwy sefydlu meincnod i Gymru yn nhermau pa mor bell rydyn ni wedi cyrraedd o ran arferion cynhwysol a mynediad, nod y prosiect hwn yw ail-ddychmygu’r gweithlu creadigol.

Rydyn ni’n gobeithio y bydd Breaking the Box yn newid hollbwysig ac felly fel rhan o’r prosiect, cafodd Diwrnod Cydrannu ei gynnal a oedd yn darparu gwersi y gall sefydliadau yn y sector eu rhoi ar waith o fewn eu sefydliadau a’u prosesau recriwtio eu hunain.

Mae’r prosiect wedi derbyn rhagor o gyllid gan Gyngor Celfyddydau Cymru er mwyn datblygu'r gwaith ymhellach, ac mae Ymddiriedolaeth Ddiwylliannol Awen bellach wedi ymuno â’r rhestr o leoliadau partner.